చికెన్ లెగ్ పీస్ గొడవ : అసలు ఏంటి ఈ ట్రంప్ – మోడీ ..

Trump for chicken leg piece
Trump for chicken leg piece

అమెరికా వాడికి ఎందుకూ పనికి రాని వేస్ట్‌ చికెన్‌ను మనకి అంటగట్టడానికి పెద్ద ప్రయత్నమే జరుగుతోంది. అమెరికా అధ్యక్షుడు డొనాల్డ్‌ ట్రంప్‌ మరి కొద్ది రోజుల్లోనే భారత్‌లో కాలు మోపబోతున్నారు. తనతో పాటే కోడి కాళ్లనూ ఈ గడ్డ పై మోపడానికి రెడీ అయ్యారు!! ఇదేంటని ఆశ్చర్యపోతున్నారా?  అమెరికాలో ఏళ్లుగా గుట్టలుగా పేరుకుపోయిన చికెన్‌లెగ్స్‌ను భారత్‌కు అంటకట్టే పనిలో ట్రంప్ నిమగ్నమై ఉన్నారు. ఇందుకు సిద్ధపడిన భారత్‌- చికెన్‌ లెగ్‌లపై ఉన్న 100 శాతం దిగుమతి సుంకాల్ని 25 శాతానికి తగ్గించడానికి అంగీకరించడానికి సిద్ధంగా ఉన్నట్లు తెలుస్తోంది. ఈ సుంకానికి ఏకంగా 10 శాతానికి తగ్గించాలని అమెరికా పట్టుబడుతోంది. ట్రంప్‌ పర్యటనలో దీనిపై అవగాహన కుదిరితే- రెండు దేశాలూ పరిమిత వాణిజ్య ఒప్పందంపై సంతకాలు చేయొచ్చు. భారత పాడి పరిశ్రమలోకి అమెరికా ఎంట్రీ ఇవ్వడానికి అంగీకారం కుదరొచ్చు.

అక్కడి లెగ్ పీస్ లు ఇక్కడి దాకా ఎందుకు ?

అమెరికాలో చికెన్‌లెగ్స్‌ను ఎక్కువగా తినరు. చెస్ట్‌ పీస్‌లను బాగా ఇష్టపడతారు. దానివల్ల ఆ దేశంలో చికెన్‌లెగ్స్‌ కుప్పలుగా పేరుకుపోతున్నాయి. వాటిని సుదీర్ఘకాలంగా నిల్వచేస్తున్న అమెరికా ఇప్పుడు భారత్‌, మరికొన్ని పేద దేశాలకు విక్రయించాలని చూస్తోంది. భారత పర్యటనకు విచ్చేస్తున్న ట్రంప్‌ మన దేశంతో పరిమిత వాణిజ్య ఒప్పందాన్ని కుదుర్చుకునే అవకాశాలున్నాయి. అమెరికా ఫౌల్ట్రీల్లో ఉత్పత్తయ్యే కోళ్లన్నీ జన్యుమార్పిడి కోళ్లే. అంటే స్వాభావికంగా అవి ఎదగాల్సిన సమయం కన్నా వేగంగా ఎదుగుతాయి. సాధారణ కోళ్ల కన్నా ఎక్కువ మాంసం కలిగి ఉంటాయి. ముఖ్యంగా బలమైన చెస్ట్ పీస్ ఉండేలా ఉంటాయి. ఇందుకోసం వాటిని జన్యుమార్పిడి చేస్తారు. అంతే కాదు వాటి కాళ్లకు హార్మోన్‌ ఇంజెక్షన్లు కూడా ఇస్తారు. ముఖ్యంగా కోళ్లకు ఇంజెక్ట్‌ చేసే సీరమ్స్‌, హార్మోన్స్ అన్నీ కాళ్లకే ఇస్తారు కాబట్టి అక్కడి వాళ్లు వాటి కాళ్లను తినరు. ఇలా అక్కడ పోగుపడ్డ లెగ్‌ పీసుల్ని మనకి అంటగట్టడానికి పెద్ద కుట్రే పన్నుతున్నారు.   

ఇప్పుడెందుకు టెన్షన్ ?

బర్డ్‌ఫ్లూ కారణంతో 2007లో అప్పటి యూపీఏ ప్రభుత్వం అమెరికా పౌల్ట్రీ ఉత్పత్తుల దిగుమతులపై నిషేధం విధించింది. దీంతో ప్రపంచ వాణిజ్య సంస్థకు అమెరికా ఫిర్యాదు చేసింది. 2014 అక్టోబరులో తీర్పు అమెరికా పక్షాన వచ్చింది. అయితే ఆ తీర్పును అమలుచేయటానికి ఆ తర్వాత వచ్చిన మోడీ సర్కారు అంగీకరించలేదు. చివరికి డబ్ల్యూటీవో ద్వారా అమెరికా ఒత్తిడి తేవడంతో 2017లో చికెన్‌లెగ్స్‌ దిగుమతికి భారత్‌ అంగీకరించింది. కానీ 100 శాతం సుంకం ఉండడంతో అమెరికా ఆ ప్రయత్నాలు ఏమీ చేయలేదు. మనదేశంతో వాణిజ్యాన్ని విస్తృతం చేసుకోవడానికి ట్రంప్‌ వస్తున్నారు. రెండుదేశాల మధ్య 2018లో 14 వేల కోట్ల డాలర్లున్న వాణిజ్యాన్ని మున్ముందు 50 వేల కోట్ల డాలర్లకు పెంచాలనేది రెండు దేశాల లక్ష్యం.

అమెరికన్ చికెన్‌ లెగ్స్ ఈ మాట వింటే చాలు దేశ వ్యాప్తంగా ఉన్న ఫౌల్టీ పరిశ్రమ గుండెల్లో భయాందోళనలు కలుగుతున్నాయి. దేశ వ్యాప్తంగా వేలాది ఫౌల్ట్రీ ఫారాలున్నాయి. ఇప్పుడు ఈ అమెరికా లెగ్‌ పీస్‌లను దిగుమతి చేసుకుంటే ఘోరంగా నష్టపోతామని దేశీయ కోళ్ల పరిశ్రమ తీవ్రంగా వ్యతిరేకిస్తోంది. దీనివల్ల లక్షలాది కోళ్ల ఫాంలు మూతబడతాయని, వాటిపై ఆధారపడిన లక్షల మంది ఉపాధిని కోల్పోతారని, గ్రామీణ ఆర్థిక వ్యవస్థ కుదేలవుతుందని పరిశ్రమ ఆందోళన వ్యక్తంచేస్తోంది. ఇప్పుడిలా చికెన్ లెగ్సే కదాని వదిలేస్తే భవిష్యత్తులో అమెరికన్లు తినని ఆహార పదార్థాలన్నీ మన దేశం మీదకు వెల్లువెత్తుతాయి.

అదే విధంగా,  అతిపెద్దదైన భారత డెయిరీ మార్కెట్లోకీ అమెరికాను అనుమతించడానికి మోడీ సర్కారు ప్రయత్నిస్తోంది. దీనివల్ల దాదాపు 8 కోట్ల మంది గ్రామీణుల జీవనం గందరగోళంలో  పడే అవకాశాలున్నాయ్‌. మేకిన్ ఇండియా అని ఎలుగెత్తి ఎగుమతుల్ని పెంచుకోవాలని చూస్తున్న భారత దేశం.. ఇలాంటి తరుణంలో అమెరికన్ చికెన్‌ లెగ్స్ దిగుమతులకు తలొగ్గితే భవిష్యత్తులో మేకిన్ ఇండియా స్ఫూర్తి కూడా దెబ్బతింటుంది. ఒకవేళ దేశీయ ఫౌల్ట్రీ రంగానికి మరిన్ని ప్రోత్సహాకాలు అందించి చికెన్‌ ధరలు తగ్గించడానికి కేంద్రం సాయం చేస్తే అప్పుడు అమెరికన్ చికెన్ వచ్చినా పెద్ద ప్రమాదం ఉండదు.